Ná meer as ’n dekade, gaan die webwerf Woes sy deure sluit. Hierdie bloginskrywing gaan egter nie die besonderhede van hierdie sluiting bespreek nie.

Wat ek wel gedoen het, is om die plasings wat ek oor die jare daar opgelaai het, af te laai om iewers anders weer op die web te plaas.

Dit gesê, gaan ek weer deur alles lees en besluit wat ek wanneer op hierdie blog gaan plaas. Party van die skryfstukke het beslis aansienlik werk nodig voordat ek dit weer sal publiseer en van die stories is so verouderd (in terme van waar die wêreldbou van Airtha-Eyrassa – die wêreld waarin die NaNoWriMo roman en vonkfiksie soos “Dust Red As Blood” afspeel – nou staan), dat ek dit moontlik nie weer sal plaas nie. Van die stories het ek al skoon van vergeet!

Van die stukke wat ek wel weer sal plaas, is gedigte en vertalings van Middeleeuse liedere wat ek ’n paar jaar gelede voltooi het. Sover dink ek daaraan om Afrikaanse plasings oor naweke te doen (aangesien ek in elk geval dreig om meer bloginskrywings in Afrikaans te skryf).

Die verlies van Woes gaan ’n groot knou wees vir die Afrikaanse aanlynskryfgemeenskap, maar ek is oortuig daarvan dat ons almal ander plekke sal vind (hetsy ’n blog of iets soos Wattpad) om ons kreatiwiteit uit te leef.